Navoiy viloyatida yo‘l harakati xavfsizligini ta’minlash va yo‘l infratuzilmasini yanada takomillashtirish bo‘yicha qator loyihalar amalga oshirilmoqda.
Tashrif doirasida IIV JXD YHXX rahbariyati boshchiligida hududda olib borilayotgan ishlar o‘rganilib, mas’ul tashkilotlar va mutasaddilar ishtirokida harakat ishtirokchilari uchun yanada qulay va xavfsiz shart-sharoitlar yaratish masalalari muhokama qilindi.
Jumladan, Navoiy shahrida "D-076-G" va "85V001" avtomobil yo‘llarini o‘zaro bog‘lovchi 3,5 kilometrlik yangi avtomobil yo‘li qurilishi loyihasi ko‘rib chiqildi. Mazkur loyiha tirbandliklarni oldini olish va harakat ishtirokchilari uchun qo‘shimcha qulayliklar yaratishga xizmat qilishi ta’kidlandi.
Shuningdek, A-379 “Navoiy – Uchquduq” avtomobil yo‘lida uzoq masofaga harakatlanuvchi haydovchilar uchun dam olish va transport vositalarini ta’mirlash imkonini beruvchi zamonaviy avtoturargohlar qurilishi bilan tanishildi.
Navoiy shahridagi Amir Temur va Islom Karimov ko‘chalari kesishmasidan shahar hokimligigacha bo‘lgan hududda amalga oshirilayotgan rekonstruksiya ishlari ham ko‘zdan kechirildi. Loyiha doirasida yo‘lning o‘tkazuvchanligini oshirish maqsadida u 2 tasmadan 6 tasmaga kengaytirilib, harakat xavfsizligini ta’minlash uchun qo‘shimcha muhandislik yechimlari joriy etilmoqda.
Shuningdek, Navoiy viloyati hokimligi ma’muriy binosida viloyat hokimi va YHXX rahbari ishtirokida yo‘l-transport hodisalarining oldini olishga bag‘ishlangan tanqidiy-tahliliy yig‘ilish o‘tkazildi.
Yig‘ilishda vazirlik va idoralar mas’ul xodimlari, mahalla raislari hamda Navoiy shahridagi maktabgacha ta’lim tashkilotlari rahbarlari ishtirok etdi.
Muhokamalar davomida yo‘l-transport hodisalarining kelib chiqish sabablari, ularning oldini olish borasidagi mavjud kamchiliklar, transport oqimini samarali boshqarish, tirbandliklarni kamaytirish, shaharda zamonaviy avtoturargohlar tashkil etish hamda sifatli va xavfsiz jamoat transporti tizimini rivojlantirish masalalari atroflicha ko‘rib chiqildi.
Shu bilan birga, voyaga yetmaganlar ishtirokidagi yo‘l-transport hodisalarining oldini olish, ta’lim muassasalari va mahallalarda profilaktik tadbirlarni kuchaytirish, yo‘l harakati qoidalariga rioya qilish madaniyatini yuksaltirish bo‘yicha amalga oshirilayotgan ishlar tahlil qilinib, mas’ullarga tegishli vazifa va topshiriqlar berildi.